Unfinished Business in Filipino

ngayong gabi
ako'y malayang
nagsusulat

walang sinumang
mapanupil ang
makakaligtas

sa kapalarang
guhit ng aking
matalas

at dumudugong
sandata.
/
paano pa kaya tutula
ang talang tinakluban
ng mapanlinlang langit?
/
kung mag-igib kaya ako
sa bukal ng iyong hinuha
ng mga pira-pirasong alala

ng mga nakaraang Paraisong
hindi mapagkakailang nakamtan
ng nilalang na katulad mo?

makakamtan ko rin kaya
ang kalayaang minsan
mong natamasa kapiling

ang mga talang
kulay bahaghari
/
tingin
sa malayo
sa hindi pa
kailanman
naabot
ng mortal
na paningin

damhin
ang hugis
ng mga planetang
hulma sa mukha
ng Manlilikha

tiisin
ang hapdi
ng pagkasunog
ng mga talang
sing ningning
ng iyong
pagkakasala

sa sugundong
pagtakip
ng Kahapon

magigising
ang tunay
na Ikaw
/
malaya ang buwan

kumakanta
nagliliwaliw

nung minsa'y kaniig
nating dalawa
ang kapwa bilanggo

sa maitim na kawalan
ng dilat nating mga mata

matalinghaga

ang sabay
na pagkakakilanlan

ng mga kaluluwang
hinagpis ang siyang

ikinabubuhay
sa laot ng mapait

na Pag-asa

nang bumuka
ang ating mga bibig

nagwala na parang
mapusok na usok

ang katanungang:
nasaan ba ang langit?
/
ang puso ko'y biyolin.
kung sana alam mong tumugtog nito.